Fikmin #Sora Locḗng#
Kḗnging: Rita Rosita
Gondola mapayan kanal, mawa dua hatḗ nu kebek kabungah. Muru tempat nu dijangjikeun, maheutkeun pasini. Bau asin cilaut teu dipalirḗ, kasilep ku ḗndahna panorama alam. Turun tina gondola, disampakeun gapura nu tohaga. Dipapaḗsan patung singa nu jangjangan pulas emas. Saparat jalan, panon teu lḗsot ningali bangunan-bangunan sḗsa kajayaan bihari.
“Hanum…patung singa mangrupa ikon Vḗnḗsia,” Lucca ngaharḗwos. “Tuh munara kaca biru, ḗta munara waktu Santo Markus. Jam astronomi nu kantor dianggo suting ku James Bond dina film Moonaker,” manḗhna nerangkan.
Vḗnḗsia, kota anu dibangun luhureun cai, ḗndah tur artistik, paingan Napolḗon jauh-jauh ti Perancis hayang ngawasa ieu kota, da katalimbeng ku ḗndahna, gerentes hatḗ.
“Lucca..Basilika Santo Markus palih mana?” cekḗng.
“Kḗ sakedap deui dugi, tah sora locḗngna tos kadangu,” manḗhna nḗmbalan leungeunna nangkeup beuki pageuh.
Trang..trang…Sora locḗng ngabelentrang beuki deukeut. Ketug jantung ngerepan. Tagiwur. Lamunan kakalayangan. Kolḗbat, Mamah nuju wiridan ngolḗbat, tasbḗ gugulayunan dina rḗmana.***
